पुणे : एखादी सामान्य व्यक्तीही रोजच्या जगण्याचा संघर्ष करत असताना एखादी अफाट कामगिरी करून जाते आणि सारी दुनिया थक्क होते. अशीच एक प्रकाशझोतात आलेली व्यक्ती म्हणजे ६५ व्या वर्षी अनवाणी पायाने धावून बारामतीतील शरद मॅरेथॉन जिंकणाऱ्या लता करे. त्यांच्या आयुष्यावर ‘लता भगवान करे - एक संघर्षगाथा’ हा चित्रपट निर्माण करण्यात आला असून, येत्या १७ जानेवारी २०२० रोजी संपूर्ण महाराष्ट्रात हा चित्रपट प्रदर्शित होणार आहे. या चित्रपटाचे पोस्टर नुकतेच प्रदर्शित करण्यात आले.
या पोस्टरवर एक उतारवयातील स्त्री शेतामध्ये शून्यात नजर लावून बसलेली आहे. त्या शेताला धावण्याच्या मैदानाचे स्वरूप देण्यात आले आहे.
परमज्योती फिल्म्स क्रिएशन्स प्रस्तुत या चित्रपटाचे लेखन आणि दिग्दर्शन नवीन देशबोईना यांनी केले आहे. या चित्रपटाचे वैशिष्ट्य म्हणजे लता करे स्वतःच मुख्य भूमिकेत असून, त्यांच्या कुटुंबीयांनी म्हणजेच भगवान करे, सुनील करे यांनीही यात अभिनय केला आहे. याशिवाय रेखा गायकवाड, राधा चव्हाण, अजय शिंदे, बालकलाकार साक्षी यांच्याही भूमिका आहेत.
आराबोथु कृष्णा यांची निर्मिती असलेल्या या चित्रपटाला प्रशांत महामुनी यांचे संगीत असून, पार्श्वसंगीत कन्नू समीर यांनी दिले आहे. मेकअप शीतल कांडरे व छायांकन आदित्य सणगरे, कमलेश सणगरे यांनी केले आहे, तर संकलक बोद्दू शिवकुमार, स्थिर छायांकन प्रतिक कचरे यांनी केले आहे. चित्रपटाचे कार्यकारी निर्माता अतुल साबळे, तर निर्मिती व्यवस्थापक प्रवीण बर्गे आहेत. ध्वनीमुद्रण वेंपती श्रीनिवास यांनी व डीआय गोविंद कट्टा यांनी केले आहे.